Prendas de Sardigna: sa gruta de “Santu Micheli” in Otieri

“Prenda de Sardigna” sighit su biàgiu peri sos sitos archeològicos de s’ìsula e oe nos nche giughet a sa Gruta de “Santu Micheli”, in Otieri.

Est una gruta de orìgine càrsica, est afaca a s’ospidale tzivile e si narat gasi ca, in antis, a curtzu b’aiat una crèsia dedicada a Santu Micheli. Est una gruta de importu mannu ca, in sos primos annos de su ‘900, s’archeòlogu Antonio Taramelli, at àpidu trastes fines (vasos e tzeràmica) de su perìodu neolìticu sardu (3500 – 2900 in antis de Cristos), ca fiat impreada comente tumba colletiva, che a sas domus de janas. A sa tziviltade chi at fatu custos trastes sos archeòlogos l’ant dadu su nùmene de “tziviltade de Santu Micheli” o, “cultura de Otieri”. A pagu tretu dae sa gruta de Santu Micheli bi nd’at una chi si narat “gruta Mara” ma in àteros giassos de sa bidda bi nd’at fintzas àteras. Fintzas a sos annos ‘50, a dae in antis de s’intrada, b’aiat una sala manna chi est istada distruida ca in cuss’ala bi depiant fàghere su mercadu de sos boes ma pustis ant detzisu de bi fàghere su campu de fùbalu.

Pro ite bos cussigiamus de bisitare custa gruta?

Ca est diversa dae totu sas àteras grutas sardas: tue pensas chi siat che a sa gruta de “Nettuno” o a cussa “del bue marino”, chi sunt prus mannas e monumentales, mai daghi intras in custa gruta abarras ispantadu dae sos istrintòrgios e dae sas gallerias istrintas meda; ca sas grutas de Otieri sunt sas ùnicas grutas in Europa de su perìodu devonianu; ca si sunt fossilizadas 25.000 annos a como; ca ant dadu su nùmene a una cultura preistòrica de importu mannu e si bisitades fintzas su museu archeològicu de Otieri podides bìdere sos repertos chi sos archeòlogos b’ant àpidu in intro.